ఉదయక్రాంతి:- బీసీ రిజర్వేషన్లు 42 శాతం సాధించేవరకు పోరాటం ఆగదని, రాజకీయ పార్టీలు బీసీ రిజర్వేషన్ల అమలుపై చిత్తశుద్ధిగా వ్యవహరించాలని బీసీ జేఏసీ నాయకులు తెలిపారు.రాష్ట్రంలోని జిల్లా కేంద్రమైన మంచిర్యాల పట్టణంలోని ఐబీ చౌరస్తాలో గల భారత రాజ్యాంగ నిర్మాత డాక్టర్ బాబాసాహెబ్ అంబేద్కర్ విగ్రహం వద్ద బీసీ జేఏసీ రాష్ట్ర కమిటీ పిలుపు మేరకు జిల్లా బీసీ జేఏసీ ఆధ్వర్యంలో ధర్మపోరాట దీక్ష నిర్వహించారు. ముందుగా రాజ్యాంగ నిర్మాత డాక్టర్ బిఆర్ అంబేద్కర్ విగ్రహానికి పూలమాల వేసి, ఘనంగా నివాళులు అర్పించారు. అనంతరం బీసీ జేఏసీ నాయకులకు బీసీ జేఏసీ జిల్లా కుల సంఘాల నాయకులు సంగెపు ఎల్లయ్య, వైద్య భాస్కర్, రాజేశం గౌడ్, పూల మాలలు వేసి, దీక్షను ప్రారంభించారు. ఈ సందర్భంగా బీసీ జేఏసీ జిల్లా కో-ఆర్డినేటర్ ఒడ్డేపల్లి మనోహర్, జాతీయ బీసీ సంక్షేమ సంఘం రాష్ట్ర ఉపాధ్యక్షుడు, బీసీ జేఏసీ జిల్లా నాయకులు డాక్టర్ నీలకంఠేశ్వర్ గౌడ్ మాట్లాడుతూ, సుప్రీంకోర్టు నిబంధనలకు అనుకూలంగా బీసీ రిజర్వేషన్లకు రాష్ట్రంలో ఉన్న కాంగ్రెస్ ప్రభుత్వం బీసీలకు స్థానిక సంస్థల ఎన్నికల్లో 42 శాతం రిజర్వేషన్లు కల్పిస్తూ జిఓ ను తీసుకు రాగా, కొంతమంది అగ్ర కుల నాయకులు బీసీల రిజర్వేషన్లను సహించలేక రాష్ట్ర హైకోర్టును ఆశ్రయించి, బీసీలకు రావలసిన రిజర్వేషన్లను అడ్డుకోవడం జరిగిందన్నారు. దీంతో స్థానిక సంస్థల ఎన్నికల్లో బీసీలకు రావాల్సిన 42 శాతం రిజర్వేషన్లు రాకుండా పోవడం వల్ల బీసీ జేఏసీ ఆధ్వర్యంలో బీసీల ధర్మపోరాట దీక్షను ప్రారంభించామన్నారు. ఇప్పటికైనా అన్ని రాజకీయ పార్టీలు బీసీల రిజర్వేషన్ల అమలు పైన చిత్తశుద్ధిగా వ్యవహరించాలని కోరారు. బీసీ రిజర్వేషన్లకు చట్టబద్ధత కల్పిస్తూ, రాష్ట్ర ప్రభుత్వం తీసుకున్న నిర్ణయానికి మద్దతు తెలుపుతూ, కేంద్రంలోని ఎన్డీఏ, బిజెపి ప్రభుత్వం పార్లమెంట్ లో రాజ్యాంగ సవరణ చేసి, 9వ షెడ్యూల్లో చేర్చి, బీసీలకు చట్టబద్ధంగా రిజర్వేషన్లను అందించాలని డిమాండ్ చేశారు. లేనిపక్షంలో రాష్ట్ర జేఏసీ పిలుపు మేరకు బీసీ ప్రజలు ప్రజా పోరాటాలకు సిద్ధం కావాలని పిలుపునిచ్చారు. అన్ని రాజకీయ పార్టీలు బీసీ ప్రజల ఆకాంక్షలకు అనుగుణంగా ఈ పోరాటాలకు మద్దతు ఇవ్వాలని కోరారు. ఇప్పటికైనా రాష్ట్రంలో ఉన్న కాంగ్రెస్ ప్రభుత్వం, అఖిలపక్ష కమిటీని ఎన్డీఏ ప్రభుత్వం నడిపిస్తున్న బీసీ ప్రధానమంత్రి నరేంద్ర మోడీ దగ్గరికి తీసుకుపోవాలని కోరారు. దశాబ్దాల కాలంగా జరుగుతున్న బీసీ రిజర్వేషన్ పోరాటం తుది దశకు చేరిందని, ఈ పోరాటాన్ని కేంద్ర, రాష్ట్ర ప్రభుత్వాలు గుర్తించాలని, లేనిపక్షంలో బీసీ జేఏసీ ఆధ్వర్యంలో బీసీ ప్రజలందరి చేత తెలంగాణ ఉద్యమ తరహాలో ఉద్యమాలను చేయడానికి బీసీ జేఏసీ సిద్ధంగా ఉందని స్పష్టం చేశారు. ఎలాంటి పోరాటాలు హుటాహుటిన ఈడబ్ల్యూఎస్ రిజర్వేషన్లు అమలు చేసిన బిజెపి ప్రభుత్వం, ఎన్నో ఏండ్లగా రాజ్యాంగబద్ధంగా మేమెంతో మాకంతా అంటూ, రిజర్వేషన్లు అమలు చేయాలని కోరుతూ, ఉద్యమాలు చేసిన బీసీ ఉద్యమాలను పాలక ప్రభుత్వాలు గుర్తించకపోవడం శోచనీయమన్నారు. ఈ కార్యక్రమంలో బీసీ జేఏసీ జిల్లా నాయకులు కొండిల్ల శ్రీనివాస్,కర్రే లచ్చన్న,కట్కోజుల రమణ,యాదబోయిన రాజన్న యాదవ్, సంగేపు ఎల్లన్న , వైద్య భాస్కర్, దేవసాని నాగరాజు, దుర్గం రాజేశం గౌడ్, ముదరపు శేఖర్, మడ్డి వేణుగోపాల్,జాడ క్రాంతి కుమారు, ఎండి ఖాసీమ్,బీసీ నాయకులు, మహిళ నాయకురాలు పాల్గొన్నారు.
