ఉదయక్రాంతి:- స్థానిక సంస్థల ఆర్థిక స్థితిని బలోపేతం చేయడంతో గ్రామీణ అభివృద్ధి సాధ్యపడుతుందని రాష్ట్ర ఫైనాన్స్ కమిషన్ చైర్మన్ సిరిసిల్ల రాజయ్య తెలిపారు. బుధవారం రాష్ట్రంలోని ఆదిలాబాద్ జిల్లా కేంద్రంలోని సమీకృత జిల్లా కలెక్టరేట్ భవన సమావేశ మందిరంలో నిర్వహించిన ఉమ్మడి జిల్లా సమీక్ష సమావేశంలో రాష్ట్ర ఫైనాన్స్ కమిషన్ సభ్యులు రమేష్, కార్యదర్శి కాత్యాయిని దేవి, మంచిర్యాల, ఆదిలాబాద్, కొమురంభీం ఆసిఫాబాద్, నిర్మల్ జిల్లాల కలెక్టర్లు కుమార్ దీపక్, రాజర్షి షా, వెంకటేష్ ధోత్రే, అభిలాష అభినవ్, అదనపు కలెక్టర్లు (స్థానిక సంస్థలు) సోమ రాజేశ్వర్‌, ఫైజాన్‌ అహ్మద్‌, దీపక్ తివారి, డిసిసిబి చైర్మన్ అడ్డి భోజారెడ్డి లతో కలిసి పాల్గొన్నారు.
ఈ సందర్భంగా రాష్ట్ర ఫైనాన్స్ కమిషన్ చైర్మన్ సిరిసిల్ల రాజయ్య మాట్లాడుతూ, ప్రతి రూపాయి ప్రజల ప్రయోజనానికి వినియోగించాలని, స్థానిక సంస్థల ఆర్థిక స్థితిని బలోపేతం చేయడం వలన గ్రామీణ స్థాయి నుండి అభివృద్ధి సాధ్యపడుతుందని తెలిపారు. నిధుల వినియోగం పారదర్శకంగా, సమర్థవంతంగా ఉండాలని, పంచాయతీలు, మున్సిపాలిటీలు ప్రజల ప్రాధమిక అవసరాలపై దృష్టిలో ఉంచుకొని, అభివృద్ధి కార్యక్రమాలు చేపట్టాలని సూచించారు. కేంద్ర, రాష్ట్ర నిధులతో అభివృద్ధి పనులను చేపట్టి గ్రామ పంచాయతీలను బలోపేతం చేయాలని తెలిపారు. సంక్షేమ ఫలాలు అర్హులైన సామాన్య ప్రజలకు చేరేలా చర్యలు తీసుకోవాలని, వ్యవసాయం, పశుసంవర్ధక, మత్స్య పరిశ్రమ, అటవీ, చిన్నతరహా పరిశ్రమలు, విద్య, ఆరోగ్యం, మహిళా, శిశు సంక్షేమం వంటి రంగాలు గ్రామీణ ఆర్థికాభివృద్ధికి పునాది లాంటివన్నారు. అన్ని శాఖలు సమన్వయంతో, సమగ్ర ప్రణాళికతో పని చేస్తే స్థిరమైన గ్రామీణాభివృద్ధి సాధ్యమవుతుందని తెలిపారు. రాష్ట్ర ఫైనాన్స్ కమిషన్ మార్గదర్శకాల ప్రకారం స్థానిక సంస్థల ఆర్థిక స్థితిగతులను బలోపేతం చేసేందుకు అవసరమైన చర్యలు తీసుకోవాలని సూచించారు.అనంతరం ఉమ్మడి జిల్లా పరిధిలోని పంచాయతీల ఆదాయ వ్యయాలు, పన్నుల వసూళ్లు, నిధుల వినియోగం, పేదరిక నిర్మూలన, గ్రామీణ గృహనిర్మాణం, విద్యుత్‌, త్రాగునీటి సరఫరా, రహదారులు, పారిశుద్ధ్యం వంటి అంశాలపై ఆయా జిల్లాల కలెక్టర్లు పవర్‌పాయింట్ ప్రజెంటేషన్‌ ద్వారా సమగ్ర వివరాలు అందజేశారు.ఈ సమావేశంలో ఉమ్మడి జిల్లా పంచాయతీ రాజ్‌, ఇతర శాఖల అధికారులు, సంబంధిత అధికారులు పాల్గొన్నారు.
