ఉదయక్రాంతి:- ప్రతి ఒక్కరూ శారీరక శ్రమ, ఆటలతో పాటు యోగాను సైతం జీవితంలో భాగంగా అలవాటు చేసుకోవాలని తెలంగాణ రాష్ట్రంలోని మంచిర్యాల జిల్లాలో కల సింగరేణి సంస్థ మందమర్రి ఏరియా జిఎం ఎన్ రాధాకృష్ణ తెలిపారు. మందమర్రి పట్టణంలోని సింగరేణి సిఈఆర్ క్లబ్ లో మంగళవారం నిర్వహించిన మిషన్ హెల్దీ, సింగరేణి ప్రాచీన యోగా దినచర్య, 15 సంవత్సరాల శాస్త్రీయ పరిశోధన అవగాహన కార్యక్రమానికి ఆయన ముఖ్య అతిథిగా హాజరై, కార్యక్రమాన్ని ప్రారంభించారు. ఈ సందర్భంగా జిఎం రాధాకృష్ణ మాట్లాడుతూ, సింగరేణి సిఎండి బలరాం ఆదేశాల మేరకు మిషన్ హెల్దీ సింగరేణి కార్యక్రమాన్ని నిర్వహించుకోవడం జరుగుతుందని తెలిపారు. ఉద్యోగి ఆరోగ్యంగా ఉన్నప్పుడే తన యొక్క కుటుంబం బాగుంటుందని, కుటుంబం బాగున్నప్పుడే సమాజం బాగుంటుందని, తద్వారా ఆరోగ్యకరమైన సమాజాన్ని నిర్మించడానికి ప్రతి ఒక్కరు కృషి చేసిన వారు అవుతారని తెలిపారు. ప్రతి ఒక్కరు తమ ఆహారపు అలవాట్లు మార్చుకోవాలని, మంచి ఆహారపు అలవాటు నేర్చుకోవడం నేటి యువతపై ఆధారపడి ఉందని తెలిపారు.
ఈ సందర్భంగా హైదరాబాద్ కు చెందిన యోగా శిక్షకులు షణ్ముఖ శివచంద్ర 15 సంవత్సరాల శాస్త్రీయ పరిశోధన పై అవగాహన కల్పించారు. ఈ సందర్భంగా ప్రాచీన యోగ వివరాలు, నిత్యజీవితంలో తీసుకోవాల్సిన జాగ్రత్తలను, ఆహారపు అలవాట్లను సవివరంగా వివరించారు. ఈ సందర్భంగా ఆయన మాట్లాడుతూ, ఈ అవగాహన కార్యక్రమంలో చెప్పిన ప్రతి ఒక్క విషయాన్ని తప్పనిసరిగా పాటించాలని సూచించారు. ఈ కార్యక్రమంలో ఏరియా ఎస్ఓటు జిఎం జి లలిత్ ప్రసాద్, సింగరేణి గుర్తింపు కార్మిక సంఘం ఏఐటియుసి బెల్లంపల్లి బ్రాంచ్ కార్యదర్శి దాగం మల్లేష్, జివిటిసి మేనేజర్ టి శ్రీధర్, జివిటిసి శిక్షకులు అశోక్, డివైపిఎం ఆసిఫ్, సీనియర్ పర్సనల్ అధికారి శంకర్, సీనియర్ సెక్యూరిటీ అధికారి రవి, ఉద్యోగులు పాల్గొన్నారు.